Omroppers op Oerol...

Oerol foarby..

2007-06-25T16:30:00.000+02:00

It is de earste dei nei Oerol en it is alwer in stik rêstiger op it eilân (fyn ik hielendal net slim, kin ik yn els gefal wer gewoan fytse!).

Juster wie sptich genôch in reinachtige dei, hjoed is it ek net in soad better.
De Oerol ôfslúting foel eins in bytsje yn it wetter troch de rein (letterlik), mar dochs wie it wol in slagge 'lêtste Oerol' dei!
It wie ek wol wer in hie moai byld, al dy minsken mei paraplu's en poncho's. As it goed is is der ek in loft foto fan makke, dy sil ik nochris efkes opspeure...

Myn Oerol sit der noch net hielendal op, ik sit hjir noch oant en mei freed. De website sil no wer opskinne wurde. It blykt dat hir noch genôch drokte is nei it festival.
Ik foen it festival sels hiel bysûnder. Ik ha my prima fermakke en in soad genoten! Fan de foarstellingen ha ik net san soad mei krigen. Der wie eins gjin tiid foar. Dat is natuurlik wol hiel jammer, mar der wien genôch oare dingen te sjen!

Kommend jier sil ik hjir sawiesa wer hinne, as besiker, meiwurker of as frijwilliger, it makket net út!

(Oerol tafferelen - Naakte man bij friettinte peal 3)

Groetsjes!

Oan alles komt in ein

2007-06-25T12:22:00.000+02:00

sa ek oan Oerol. It betsjut dat dizze blog ek net langer ferfarske wurdt. De ôfrûne wike ha we besocht jim op dizze side by te praten oer ús ûnderfinings op it eilân en tidens it festival. Is dat slagge? Dy fraach meie jim beantwurdzje. Dus ha jim op of oanmerkings, skriuw se yn de comments.

Rein

2007-06-24T09:23:00.001+02:00

It is hast healwei tsienen. Alle kollega's lizze noch op ien ear as ik hjir yn it hotel - De Walvisvaarder - myn ontbijtsje yt. De oare gasten fan it hotel komme ien foar ien it restaurant binnen foar harren ontbijtsje. It wurd drokker, by it iten stiet in rij. Doe't ik hjir in healoerke lyn binnenkaam wie it noch stil en sieten der mar in man as tsien.

Hjoed is de leste dei, de alderleste wurkdei. En as ik nei buten sjoch sakket de moed my yn de skuonnen. It hoost hjir - it komt hjir echt mei bakken út 'e loft fallen. Ik ha gjin auto, gjin reinpak en gjin paraplu. Myn broek, sa'n grien gefal mei in stof sa tin dat jo der hast trochhinne sjen kinne, is dweiltrochwiet. Ach, ik kin der ek wol wer om genize. Wat ma'k oars no?

Foar hjoed stiet net in soad op it programma. Ik wol eins foar it nijs noch in pear ynterviews dwaan foar ús simmerrige oer fakansjekapitaal. We wolle minsken freegje wer't sy harren jild ynstikke foar de fakansje. En dat kin fan alles weze; in boat, in sleurhut of in tinte, mar ek in rechsek (foar de trekkers under ús), in fyts of oars wat. Derneist is jun fansels de ofsluting fan Oerol. Derfan moat fansels ek in reportaazje komme foar it nijs fan moarnier. Genoch te dwaan dus.

Yntusken binne Maaike en Abe by my oan tafel skood en ek Linze is der by kommen. It reint noch hieltyd mar buten wurdt it al wat ljochter. Ik sjoch sa no en dan sels de sinne trochkommen. Wurdt it miskien dochs noch in moaie dei...

Leste dei alwer..............

2007-06-23T10:06:00.000+02:00

En dan is it al wer sneon en prate we oer ynpakken en opreden! Ast hjir bist rekkest samar dyn tiidsbesef kwyt, hast it gefoel datst hjir al dagen en dagen omslachst en soest noch wol hiel graach bliuwe wolle, mar ja ek Oerol haldt wer in kear op. Tongersdei (ja it wie leau'k tongersdei) mei de kameraploech nei de foarstelling fan Sirkus Ronaldo west. In fantastyske foarstelling yn de sirkustinte op Aike's Plak yn Hoorn. De bruorren Ronaldo sette in sirkussjo del om "JO" tsjin te sizzen. Wat in gong en aksje! It publyk wurdt der ek aktyf by belutsen en dat makket it noch leuker. Dizze foarstelling sit jun yn it Oerolsjoernaal, dus wol even sjen allegear!
Jun sil ik as utsetter noch nei de foarstelling Centauer op Easterein, ik ha der allinnich mar opteine ferhalen oer heard, dus dat wurdt grif in moai beslut fan Oerol 2007. Mar foardat it sa fier is, moat der hiel wat opreden en ynpakt wurde, dus de hannen ut de mouwen!

De Jonges

2007-06-21T20:42:00.000+02:00

Alwer it fjirde Oerolsjoernaal ûndertitele. It giet hurd. Dy foarstelling fan De Jongens liket my hiel aardich. Kolderyk yn de goede sin fan it wurd. Grappich dat se oan 'e ein fan it ynterview 'oant sjen' seine. Pyt Paulusma-effekt, kin net oars. It shot hjirnjonken docht my tinken oan in Discoveryprogram fan in pear jier ferlyn. De wurking fan masines, útlein foar dummys. Besjoch it program freed op www.uitzendinggemist of op www.oerol.nl ûnder filmpjes....

alwer tongersdei

2007-06-21T16:56:00.000+02:00

It is al wer tongersdei. ik reitsje de tiid hjir wat kwyt. Dat komt ek in bytsje omdat ik hyltiid dwaande bin te betinken wat we dwaan sille, wanneer we dat utsjoere sille en wanneer it dan opnommen wurde moat ensa. En dan giet sa'n wike dus hurdt. De "nije" ploech is alwer follop oan it wurk. We hiene even in probleem omdat der in ferslachjouwer siik wie en dus net komme koe. Mar dat ha we oplost trochdat Ronnie in dei langer bleaun is (jo Ronnie)en Halbe Piter in dei earder kommen is, se binne sa fleksibel dy mannen. De planning foar de kommende dagen is roen. Jun sil der in ploech nei circus Ronaldo. In Belgysk selskip mei in leuke foarstelling erg fisueel. Dat wurdt wol in leuk item dus. Moarn noch even en dan sit it der foar my wer op. Albert moat him de leste dei sels mar rede mei de pr teksten. Jun noch even nei it stran en Vis a vis

Werom nei hûs

2007-06-21T16:32:00.000+02:00

It sit der op. Ik ha it stokje oerjoen oan myn kollega Femke de Walle. Sy sil jim de kommende dagen byprate oer it Oerol nijs.

Dan de fraach fansels hoe't it wie. It wie geweldich. It waar wie goed, de sfear op it festival en mei de kollega's super. Boppedat ha ik in soad foarstellings sjen kinnen.

Myn tips foar de minsken dy't it wykein nei Skylge gean:
1: David Goddyn en Kim Scheerder mei Carrousel. (Leuke minsken en goed rau teater)
2. Toneelgroep Oostpool mei Bok en Geit. (Goede teksten, sterke dialogen)
3: Nieuw West, Mariposa. (Binne studinten fan de Mime opleiding. Is in leuk stik)
4. Súver Núver, Niet voor vrouwen en Ja tegen het jungleavontuur (Stik om by nei te tinken)

Dy't je wol misse kinne:
1. Circus Baobab, De aap van Saudieu. (tsja, moast der fan hâlde. Knap dien, dat wol)
2. Spinvis, op z'n eentje. (Ja minsken fine dit leuk. Net echt bisûnder. Ek de teksten falle ôf)
3. Alba Theaterhuis, Mahagonny. (Twifel oer dizze. Erotyske foarstelling, byldzjend mar teksten binne slap. Dêrom op trije)

Einliks sliepe...

Twadde dei op Oerol

2007-06-21T14:37:00.001+02:00

Fan ' e moarn frege in kollega: bist do juster kommen? Ik moast gewoan even neitinke...... juster? Wie it noch mar juster dat ik hjir kommen bin? It fielt krekt as bin ik hjir al wer in hiel skoft! Justermoarn mei de Koegelwieck fan 8.30 rjochting Skylge gien, der't Engelien my fan de boat helle. Op nei Westerkeyn nei de rest fan de kollega's. De earste dei brukt foar de oerdracht fan de produksje-kant fan it Oerolsjoernaal. Middeis nei de foarstelling fan Gnaffel west om te besjen oft it leuk is om der opnamen fan te meitsjen. Ik fun it hiel leuk en hjoed binne we der dan ek hinne om in reportaazje te draaien. Nei de foarstelling op it fytske werom nei Westerkeyn om te iten en dernei fluch nei it hotel om de twadde helte fan Jong Nederlan - Jong Ingelang te sjen, jemich wat in spannende wedstriid. Juns soe ik mei Albert nei de foarstelling Zeeuwse Nachten, we soene om 20.00 oere fuort, dus krekt foar de finale untknoping fan de penalty-sjitterij moasten wy fuort. Fia de SMS hearde ik fan Linze dat Foppe-en-dy it dochs noch wun hiene.......... YES!!!! De foarsteling fan Zeeuwse Nachten oer Jan van Spijk wie fantastysk! Ien dei op Oerol en al twa foarstellings sjoen, wat haw ik dochs in freeslike baan............
Hjoed earst mei de hiele Omrop-ploech praten oer de dei fan hjoed, wat dogge we en wa docht wat. Hokker foarstellings wolle we hinne om opnamen te meitsjen, derfoar moatte kaarten oanfrege wurde by it Oerolkantoar. Nei it iten earst nei de SPAR om boadskippen, want der moat tuskden de middei fansels wol wat iten wurde. Dernei mei Albert, Piter, Abe en Linze nei West om de presintaasjeteksten foar it Oerolsjoernaal op te nimmen, dat foel net ta yn de drokte fan West, mar op de steiger gie it better. Op de weromreis gau by it Oerolkantoar oan om de bestelde kaarten foar hjoed op te heljen.
Werom op Westerkeyn tiid om in broadsje te iten en de ynformaasje op ynternet te setten. Tekst meitsje, foto's derby sykje. En no dus even blogge. Oant in oare kear.

Presintaasjeteksten opnimme

2007-06-21T14:11:00.000+02:00

By it Griene Stran stie de leste tekst der yn ien kear op.

Op de steiger tusken de skippen gie it in stik better............

Oan de foet fan de Brandaris wie it ek - foar us - te drok

We koene Albert hast net weromfine tusken al dy Oerolgongers........

Presintearje: It liket op ' e tillevyzje altiten sa maklik, mar doch it mar ris! Hjoed hiene we betocht dat it wol leuk weze soe om de presintaasjeteksten fan it Oerolsjoernaal yn West op te nimmen. Yn de drokke winkelstrjitte, gesellich mei de minsken en diskes fan de bradery op de achtergrun............ Gesellich wie it yn West, de bradery die goede saken...... mar as lokaasje om de presintaasjeteksten op te nimmen wie it minder geskikt. Te drok, dus mei it hiele spul nei in oare lokaasje, op de steiger yn de haven. Ek goed foar in prachtich plaatsje en folle restiger. De leste tekst by it Griene Stran en klear wie it. Albert hat de tekst wit hoe faak oer dwaan moatten, mar uteinlik wie elk: einredakteur, kameraman en ludsman tefreden en koene we nei de broadsjes op Westerkeyn.

Fêste grûn

2007-06-21T13:27:00.000+02:00

Wat kinne minsken dochs frjemd reageare. Sa as dy frou by de foarstelling Solveig. As aktrise Dahlia Pessemiers yn har rol har fertrietlike iensumens toant, moat dizze frou smaaklik laitsje. As gie it hjirre om in kostlike grap. It sil wol ûnmacht wêze, mar steurend is it wol...
Ik bin foar twa dagen eefeks werom op de fêste wal om linea recta troch te reizigjen nei Amsterdam foar in konsert fan Lou Reed in de Heineken Music Hall. In integrale útfiering fan syn konsept-elpee Berlin út 1973 sil it wurde. Mei koar en orkest. 65 jier alwer, mar wat in brok dinamyk. En mei it muzikale geweld yn de tajeften Sweet Jane en fansels Walk on the wild side is de jûn hielendal slagge!! Dus fansels in T-shirtsje kocht foar........35 euro. It kaartsje fan 65 euro dêrby en in pilske yn plastic foar 3 euro makket it jûntsje út net echt goedkeap. It jout yn alle gefallen de Oerol-fan yn my wer fêste grûn ûnder de fuotten. Dan falle de prizen foar de Oerol-foarstellings en merchandising ommers ta en it bier sit lokkich wol yn glêzen.
Mei Lou's Sad Song djip yn it hert dus de koffers wer pakke en moarn gau rjochting Skylge...

In ien nei leste boadskip fan Oerol

2007-06-21T10:40:00.000+02:00

Der binne in soad untefreden minsken op Oerol dit jier. Oerolgongers fine dat de organisaasje te kommersjeel wurdt en dat der kwalik noch mar wat mei. Sa binne de kaarten fan de populere foarstellings hast allegear al ferkocht. Dan binne der de eilanners. Dy ha it ek in bytsje han mei de organisaasje ( Sjoch hjir en hjir). Want as kompensaasje foar alle drokte en ynset kinne de Skylgers in pear dagen yn it foar kaarten keapje. In meiwurker fan Oerol hat lykwols in flater makke en no kinne de eilanners kwalik nei de grutte foarstellings. De eilanners ha wol in punt. Guon sette har bot yn foar it festival en dy moast as organisaasje te freon halde. Minder begryp ha ik foar har klacht oer de mentaliteit fan de minsken. Dy feroaret gewoan, minsken wurde hurder en easkje mear. It is spitich mar it is net oars.

De Oerolgongers moatte har neffens my mar wat ynskikke. At se gjin kaarten krije kinne moatte se mar earder yn de rige stean gean. It is hjir dan kommersjeler wurden? Ja fansels. Dat kin ek net oars at sa'n festival hieltyd grutter wurdt. It hat gefolchen foar de folsleine organisaasje. Hjir op de Westerkeyn meist gjin sels meibrochte bole ite. Kommersjeel? De optredens moatte betelle wurde. It grutste part fan de kosten wurdt opbrocht troch de horeka. Dus sunder opbringst gjin Oerol. Minsken moatte har net sa drok meitsje. Se moatte gewoan genietsje.

Undertitels

2007-06-20T21:23:00.000+02:00

Sa, de ûndertitels fan diel 3 stean der ek op. It binne der hjoed wol in soad: in lyts hûndert. Bykommende fertragingsfaktor is ek dat ik in soad begoogelje moat. Tink dan oan skriuwwizen fan foarstellings en personaazjes en sa. Oer personaazjes praat: Wat spatte dy Belgyske Dahlia Pessemiers fan it skerm ôf. Se spile Solveig yn it stik fan Jellie Schippers. Har freon Peer Gynt is al tweintich jier fuort. Se stelt har foar dat er samar ynienen thúskomt en sy is net yn de keamer. Se sit op it húske of sa. Peer Gynt wurdt lilk, want se soe ommers op him wachtsje. Wat docht er dan? "stampen tegen daar en daar en daar. En roepen en schreeuwen 'Solveig, SOLVEIG!"
Ha jim Dahlia mist, sjoch dan op www.omropfryslan.nl of op www.uitzendinggemist.nl .

noch wat foto's

2007-06-20T21:07:00.000+02:00

Noch wat foto's, Martijn yn de nije radiowein, Albert en Hayo yn de redaksjekeet en de lunch buten bij de keet.

wat foto's fan Westerkeyn

2007-06-20T20:59:00.000+02:00

Thomas en Sybrand yn de heechwurker foar topshots, de radio utstjoering fanut it mediacafe wei en Wibo en Piter dwaande mei de einmotaazje fan it Oerolsjoernaal

Oer de perikelen fan in radio regisseur

2007-06-20T11:12:00.000+02:00

We hawwe der twa hân, en noch trije foar de boech: de hiele middei Oerol radio. It giet dat it slytjaget, al hawwe je dat as regisseur net altyd yn de gaten. Want it bliuwt hektysk om de hiele middei roppende ferslachjouwers, technici en presentators op de koptillefoan te hearren. Gelokkich kin ik dy oant no ta noch alle dagen om seis oere mei in foldien gefoel oan de 'wylgen' hingje.

Der is hjir safolle te dwaan, der is safolle moaie radio te meitsjen, dat we de hiele middei wol ferslach dwaan kinne fan al dat moais. Mar je moatte fansels ek noch muzyk draaie! En ja, dan moatte je as regisseur wolris 'bandsjes' lizze litte. Ik hoopje dat it slagget om dochs mar safolle mooglik út te stjoeren dizze wike. Oan de ferslachjouwers sil it net lizze, en ik sil myn bêst der foar dwaan!

En dan hawwe we ek noch alle dagen in band by ús yn it mediakafee. Juster en earjuster bestiene de bands foar in grut part út Afrikanen. De kommunikaasje is dan wolris wat dreech. De gitarist fan juster, de allerbêste gitarist fan de Kaapverdyske eilannen, wie sa wurch fan al dy optredens en fan it foar him frjemde iten, dat er it net mear opbringe koe om foar ús te spyljen. Hiel jammer, mar foar it publyk yn it mediakafee koe dat it net bedjerre, want der wiene ek dûnsers by en it moat in prachtich gesicht west ha. Foar ús yn de radiowein wie der minder te genietsjen...

Tefreden

2007-06-19T21:01:00.000+02:00

De earste twa Oerolsjoernaals binne utstjoerd. Ik bin tefreden. It altiid spannend wat it wurdt. Je kinne yn je holle fan alles betinke mar it moat noch wol makke wurde en dan binne je fan safol faktoaren ofhinkelik.
Mar it giet goed. Neffens mij ha we leuke items makke en is yn elts gefal de sfear hjirre prima.
Ek foar de kommende dagen ha we in hoop leuke dingen yn de planning
Moarn komt der in nije kameraploech en sille Halbe Piter en janjelle de redaksje fersterke, Wer wat farsk bloed silk mar sizze

De earste kear...

2007-06-19T20:51:00.000+02:00

Noch ien nachtsje sliepe en dan lit ek ik my hielendal ûnderdompelje yn de Oerolsfear. En ik sil jo earlik bekenne: ik ha echt gjin idee wat dy sfear no krekt is. Ik bin nammentlik noch nea op Oerol west. Fan kollega’s hear ik al in pear wiken oer it fenomeen Oerol. Men seit: of jo fine it geweldich, of jo fine it hielendal neat. By hokker kategory ik nei myn Oerol-aventoer hear sil ik jo grif witte litte; foarearst lit ik alles mar wat oer my hinne komme.

Fia de ferhalen fan de kollega’s dy’t al in tal dagen op Skylge sitte sjoch en hear ik fia radio, tillevyzje en dit blog wat der allegear te dwaan is. It liket my wol wat: mei in rekorder yn myn taske wat oer it eilân fytse, kuierje of drave, op syk nei moaie, nuveraardige ferhalen.

Fan tongersdei ôf sil ik Hayo ferfange yn ‘e radioploech. Hy hat ferslach dien fan de iepening en de earste dagen fan it festival en ik slút it ôf. Fiif dagen Skylge, fiif dagen sinne (dêr hoopje ik alteast op), seelucht, strân, musyk, teater en in fakânsjesfear. Ik soe hast ferjitte dat ik gewoan oan it wurk moat....

2007-06-19T20:47:00.000+02:00

De sonindeseesynsakke op Skylge. Dat soe wat wêze mei dit prachtige waar. Mar ik sit hjir yn Ljouwert. Jimme kinne myn ûndertitelwurk besjen op http://www.uitzendinggemist.nl/ Zegt het voort oan alle Hollânsktaligen dy't gjin Frysk ferstean....O ja, ik haw it fansels oer it Oerolsjoernaal dat alle dagen op Omrop Fryslân Televyzje komt.

It sjoernaal

2007-06-19T20:43:00.000+02:00

Dei twa fan it Oerolsjoernaal. Alles giet goed. De Nederlânske ferzje is te sjen op http://www.uitzendinggemist.nl/.

de technyk op westerkeyn

2007-06-19T20:30:00.000+02:00

de radio en tv wein mei heechwurker foar antenne

nei twa oerol sjoernaals en live radio fanut it Mediacafe wei kin ik wol sizze dat it technysk moai foar mekoar ha. 3 montaazje plekken foar TV, 3 ynternet plakken foar de redaksje, yn it mediacafe us beamer mei derop trailers en programma's fan de Omrop, alles wurket.
Ik doch alle dagen foar Oerol en NRC de projeksje fan foto's bij de kofjegesprekken, der komt in soad publyk op of en it is hartstikke ynteressant. Al mei al in goeie gearwurking tusken Oerol, NRC en Omrop Fryslan.

rjochts de giele container is it redaksje kompleks.

it mediacafe bij jun tiid

Cargo op it stran
Justerjun de foarstelling sjoen fan Theatre du Centaure mei 2 hynders en in esel, in prachtsjo, mar wol hiel warm yn de tinte, dus dernei in lekker pilske op it terras fan Heartbreak Hotel, rinne de twa hynders en de acteurs efkes oer it stran. De foarstellingen giene buten gewoan troch, prachtich.
Jun sil ik nei de Lunatics, dernei noch efkes nei de Rustende Jager (Brigitte Kaandorp is der leau ik ek), dat ik ha it der mar drok mei. O ja, moarn te moarn Meindert Talma yn it Media cafe.

Ferset op Oerol

2007-06-19T14:57:00.000+02:00

In suksesfol Oerol dit jier. De measte besikers oant no ta, seit de organisaasje. Dat kin ek allinne tanksy in slimstrakke organisaasje. Dy wurdt hjir en dêr wolris wat te strak. Kaartsjekontroleurs krije bytiden wat in militêre hâlding en trede by 'oertredings' ûnmeilydsum op. Kom op organisaasje, in passepartout mei gjin ausweis wurde fansels!
En wat te tinken fan de oankundiging by de kassa fan Westerkeyn: op het terrein mogen geen eigen meegebrachte consumpties worden genuttigd. Sels in fleske wetter is offisjeel net mear tastien.
Wat bliuwt dan noch oer fan dy freonlike Oerol-hippykultuer. Relax man, weet je. It is dochs tanksy dy hâlding dat it Oerol-publyk sûnder klachten en geseur oerenlang yn de rige stean kin foar syn tagongskaarten.
Net frjemd dus dat yn it Oerol-krantsje al it earste ferset tsjin dit soarte saken oankundige wurdt: 'stop de commercie! Steun onze actie en eet je eigen brood op de Westerkeyn op!! Fan herte!!!
Oerol is dit jier ek wer machtich, mei in prachtich programma, mar Oerol moat wol oeral Oerol bliuwe!

It strân by Easterein...

2007-06-19T14:42:00.000+02:00

... leit fol mei grutte skulpen fan glês. Stimmen komme dy temjitte. Se fertelle oer de see, it miljeu en hoe't it giet mei de wrâld. It boadskip dy't se oerbringe wolle is dat je ek op in oare wize nei it lân sjen kinne. De skulpen binne ûnderdiel fan de keunstrûte oer it eilân en hiet 'Zomersprookjes' fan SLEM. Dat stiet foar Stichting Landschapstheater En Meer.

Net eltsenien komt foar de ferhalen fan de skulpen. Oaren fiskje foar de barbeque.

2007-06-19T12:36:00.000+02:00

Justerjûn nei de absurdistyske foarstelling Carroussel west fan David Goddyn en Kim Scheerder, in prachtfoarstelling. As de sjoggers no mar net tinke dat it by my altyd oer hynders en stront gean moat. Jo nederige ferslachjouwer kiest de foarstellings ek net sels út, mar it oerkomt ús team allgear wol fansels. Neffens David giet Carroussel oer de essinzje fan it libben: eten en schijten, daar komt het op neer. Zelfs in de liefde....
Wat wol sa aardich wie, de foarstelling fynt plak op Camping Cupido by Hee. Dêr't ik as jonkje fan 12 oant 16 jier mei ús âlders alle simmers op it kampearterrein stie. Dus eefkes by boer Cupido en syn frou thús lâns en wier, se wiene my noch net ferjitten. Oan 'e keukentafel eefkes bypraat fan in fier ferliene. Wat ha we dêr in pracht fakânsjes hân. En boer Cupido rydt dizze simmer al 40 jier lang de kampinggasten fan Cupido nei de boat hinne en wer. Proficiat!!!
Frou Cupido sil jûn nei de foarstelling yn har skuorre. Skelkje dus mar foar frou Cupido en graach oant in oare kear.....

Bûtendoarkeunst

2007-06-18T22:06:00.000+02:00

Soks bedoel ik. Dizze foto is fan Oerol ferline jier.

fan de sydline

2007-06-18T21:49:00.000+02:00

Healwei tsienen: de ûndertitels fan it earste Oerolsjoernaal stean derop. Klear foar montaazje fan moarnier. Jammer dat ik sels net op it eilân sit. Dus moat ik Oerol op ôfstân beoardielje. It liket my drok, wol moai, mar betiden ek reinich. En ik bin benijd nei de byldzjende keunst. Moaie objekten op it strân, lykas juster te sjen wie op Omrop Fryslân Televyzje yn de dokumintêre oer Oerol 2006.

2007-06-18T21:45:00.000+02:00

Leechhingjende damp, hynders en in moantsje, no noch in goeie kamera...

OK, kin't skele, noch ien fan it oe sa gesellige Westerkeyn-terrein by night.

De natoerdetektive...

2007-06-18T17:26:00.000+02:00

Op Skylge strúnt dizze dagen in echte natoerdetektive om. Gjin bonke hat foar him in geheim. Fisken, fûgels of in krab; it makket Jacco Steensma neat út. Hy ûndersiket alles.

Op de tafel lizze Eidereinen en Jan van Genten. Foar de yngong hinget in rottende Brúnfisk. In frou hie tsjin Jacco sein dat der in haai op it strân lei. It wie 'mar' in brúnfisk. Ek aardich fansels.

Ek dit is Oerol...

2007-06-18T17:24:00.001+02:00

Sjoen by it Griene strân by West-Skylge

De oare kant fan Skylge

2007-06-18T15:03:00.001+02:00

... dat is fansels de natoer. At je bykomme wolle fan alle keunst en kultuer. Dan kin je sjen nei de fûgels, of nei skiep dy't nei har droechfallen skip rinne.

Of hjir, de Kleine Parelmoervlinder. Sjochst kwalik op it eilân. Dit is dus in bisûnder moment.

Efter op it eilân, oan it begjin fan de Boschplaat, steane de fjilden fol mei dizze blommen. De gevlekte orchidee.

2007-06-18T12:55:00.000+02:00

Uteinset mei Cargo, de moaiste Oerol-foarstelling fan dit jier. Wat wol in minske noch mear. Boppedat yn 't selskip fan Rients Terpstra en Kees Cupido, twa echter Skylgers dy' t alles fan it Fryske hynder ôfwitte, en dat hie justerjûn de haadrol! Terpstra wol takomme jier sels mei in hynste-act op Oerol komme en jout Omrop Fryslân jûn de primeur.
Oerol sûnder Douwe Heeringa dit jier skynt ek eefkes wennen te wêzen foar de omroppers, want de catering tusken de middei kaam in oere letter op tafel as oars. Hawar, oan geastlike fieding gjin gebrek dit Oerol. Smullen dus!

2007-06-18T11:59:00.000+02:00

Se neamme harren sels de muppets :)

2007-06-17T14:04:00.000+02:00

Thomas en Sybrand oan it wurk op it 'Groene Strand'.

In poncho kin ek hiel goed tsjinst dwaan as reinhoes foar de kamera!

Redaksje op lokaasje

2007-06-15T22:54:00.000+02:00

Hoe't wy wurkje op lokaasje? No sa...

Oerol: De iepening!

2007-06-15T22:43:00.000+02:00

Hé hé... Hjir ha we lang op wachtsje moatten. Oerol is iepene. Tiid om foarstellings te sjen en moaie radio te meitsjen.

Dat lytsje mantsje op dy grutte stoel is Ronald Plasterk, ús minister fan kultuer en ûnderwiis. Wol wat in aparte man. Hy seit wat hy tinkt. De fraach is lykwols of dat geunstich is foar Oerol. Foarsitter Kees van Twist fan it festival wol nammentlik mear ryksjild ha. 'Nergens voor nodig' seit Plasterk. 'Rembrandt kreeg ook geen subsidie en hij is toch één van de grootste Nederlanders allertijden.'

Jos Thie. Hy is dit jier de tydlike artistyk leider omt Joop Mulder in jier frij naam hat. Wy kinne him fansels noch fan Tryater.

Oerol: Op 'e boat!

2007-06-15T22:35:00.000+02:00

It wie drok op 'e boat. Der wie gjin sitplak mear te finen. En dat bliuwt de kommende dagen ek sa. Neffens in meiwurker fan Doeksen binne sneon en snein alle fearboaten fol. Gjin plak mear te krijen. Útferkocht!

It earste stikje Oerol begjint al op de boat. Fansels de sfear mar ek keunst. Yn de fertrekhal hinget in houten objekt dat liket op in UFO. It is makke troch keunstner Arjen Boerstra. Op de strekdam stiet in hynder. Dit keunstwurk mei de namme 'Broodpaard' is makke troch Joris Collier.

The day before...

2007-06-14T16:47:00.000+02:00

Moarn is it safier, Oerol los!

Ik ha der no trije dagen op sitten en ik moat bekenne it is in slopend wereldsje, mar wol hiel leuk!(en der krije wy natuurlik ek wer enerzjy fan!).

Maarrrr.... No moat it noch gebeure! De lêtste foarberiedings wurde dien en eltsenien makket harren klear...

Moarn sil ek it earste deikrantsje fan Oerol útkomme en oansjoen ik op it momint by de deikranteredaksje fan Oerol sit, kinne jim jim wol foarstelle hoe't it hjir giet. Al moat ik sizze dat eltsenien sjoen de omstannigheden aardich rêstig bliuwt (sil wol mei de sfeer fan it festival te meitsjen ha).

Ik bin hiel benijd hoe't myn dei der moarn út komt te sjen. Dit is myn earste kear Oerol überhaupt, dus lit stean dat ik as meiwurker wit ik hoe't soks der oan ta giet. Spannend dus!
No oan't Oerol! (en de minsken dy't net komme kinne alles moai folgje fia televyzje, ynternet, radio nim it mar op!)

Groetsjes Eva

It is hjir no al in drokte fan jewelste oeral (nee net oeról maar oerál) fietsen, dit wurdt aanst dus nóch in gruttere gekkeboel :P!

(noch hieltiid gjin wurdeboek beetkrije kint, dus nochris: excusé moi! (lêtste kear...))

Oerol by nacht

2007-06-14T14:27:00.000+02:00

It strân by Hoorn, om 01.00 am.

kultuer yn alle hoeken en gatten

2007-06-14T12:09:00.000+02:00

6 dagen as einredacteur nei Oerol. Lange dagen, let op bêd, drege beslúten, eigensinnige artiesten en redakteuren. In drege klus mar goed, der sil toch ien it dwaan moatte. Ik offerje my graach op....
Want eins is der gjin moaiere klus as it Oerolsjoernaal. In wike lang op in moai eilân mei boeiende minsken. Kultuer yn alle hoeken en gatten. De lêste wiken in protte kontakt hân mei Willemijn Steentjes en Jos Thie. Der is wer fan alles te belibjen en te sjen.
It earste wykein sille we mei Skylger hynstemannen, Rients Terpstra en Kees Cupido nei Théâtre du Centaure. En mei de Heit en Mem fan Willem Wassenaar nei Almost a Bird Theatre.

Mar we binne ek op syk nei leuke persoanlik Oerol ferhalen. It leafst sterke ferhalen.
Dus at jim op Oerol binne en jim ha in leuk ferhaal lit it ús witte.

It eilanner waar

2007-06-14T11:28:00.001+02:00

Der is waar, en der is Oerol Waar. De kommende wiken sil dizze man, Jan D. Pals fan Hoorn, alle dagen om 13.30 in eilanner waarberjocht fersoargje. Pals is de man dy't alles wit fan it waar op Skylge. Jierrenlang hat hy him der yn ferdjippe. Hy wit alles fan 'Cumulus, Stratus en Stratocumulus' en wat dat betsjut foar Skylge. Harkje!

Earste kear Oerol

2007-06-12T21:09:00.000+02:00

Oan it sfearplaatsje sil it net lizze: fanôf freed bestiet myn dekôr út strân, see, ûndergeande sinne en it lûd fan seefûgels op 'e eftergrûn. Tûzenden minsken binne my foargien en wiene lyrysk: "Prachtich moai, as bist hielendal fan de gewoane wrâld". Dochs ha ik in bytsje de senuwen. Wat moat mei, wer sil ik ferslach fan dwaan en hoe fyn ik myn wei op dat eilân? Fansels ha ik al efkes 'Oerol voor beginners' trochploegd, mar dochs: sa'n earste kear bliuwt spannend. Dêrom...

Tiid foar tips! Es efkes sjen wat de deskundigen op ynternet sizze oer 'de earste kear'. Ah, Singlesite biedt útkomst. In pear tips dy't sy jouwe:

Ga in elk geval van huis met een positieve instelling en een goed humeur
Dat slagget seker. Wurkje foar de radio is al fantastysk leuk, mar om dat te dwaan op in eilân mei teater en muzyk en in fleuriche fakânsjesfear is hielendal moai.

Presenteer je zelf verzorgd, maar wel zoals je bent
No hoech ik net te presintearen, mar ik ha al leuke shirts sjoen fan Oerol. Gjin probleem!

Date kort maar krachtig
Foar my mocht de date mei Oerol oars de hiele moanne juny wol duorje. Se sille de nachten wol bedoele, dat we net oant moarns fjouwer oere noch by in kampfjoerke steane te dûnsjen.

Zweetvoeten, slechte adem en rouwrandjes onder de nagels zijn afknappers
Dat sis ik, net te lang neisitte. De skjinne sokken ha ik al ynpakt. Tsja, mei al dat sân fan it Griene Strân en dy dúnen dêr't je by op klimme moatte om by in moaie lokaasjefoarstelling te kommen sille smoarrige neilen grif wolris foarkomme. Gelokkich ha we dêr de hotelkeamer mei douche wer foar.

Ok, je bent zover, inmiddels lichtelijk zenuwachtig
Dat kinst wol sizze ja. Wie de boat no al fol? Ha we genôch accu's foar de stjoerders dêr't we ferslach mei dogge? Wêr kinne we ús mediatent fine?

Lekker een aperitiefje om de ergste spanning wat af te zwakken, geen probleem
No, wy begjinne de redaksjefergaderingen meastentiids mei kofje. Dat liket my better.

Dat je niet de hele tijd over jezelf moet gaan zitten praten wist je al lang
Yndie, it giet om de festivalgongers, teatermakkers en Oerol-wurkers. It tema 'Sterke ferhalen' lient him goed foar moaie reportaazjes en live ferslach. Wy wolle witte wat minsken dwaande hâldt, of't se it nei it sin ha en hokker foarstellings at yndruk op harren makke ha.

Praat in de eerste instantie over 'veilige' onderwerpen
Neat dêrfan! We wolle alles witte. Oerol Leafde, Sterke ferhalen en ôfskiedtriennen op de boat: jo sille alles hearre.

Ook al heb je het reuze naar je zin gehad, dring jezelf niet op door direct aan te sturen op een nieuwe afspraak
Dat wit ik noch net. At ik alle moaie Oerol-ferhalen sa hear sil ik it tige nei it sin ha en grif alwer langje nei takom jier. Ik ha d'r sin oan, myn earste kear Oerol!

Op Skylge...

2007-06-12T14:59:00.001+02:00

Tiisdei te jûn, 19.50; op 'e boat nei Skylge...

Nei sa'n lytse twa oeren farren wie de brandaris wer yn byld.

Mei it lêtste bytsje sinne knoffele ik mei fyts en bagage (té folle tassen fansels) fan de boat.

Ik sil de komende tiid yn in apartemintsje yn Kinnum ferbliuwe. Al betwyfelje ik of't ik der in soad wêze sil.

Hjoed kinne we oan de slach mei de foarbereidings fan Oerol. Oer in pear dagen sil "hel" (tusken grutte oanhellingtekens) hjir losbrekke, dat der is genôch te dwaan. Oan it wurk dus!

Groetnis Eva
(ps: Spitich genôch ha ik hjir noch net in Frysk wurdeboek beetkrije kint , dus as myn Frysk net hielendal goed is, excuses).

Efkes Weromsjen

2007-06-11T22:41:00.000+02:00

De nije TV wein (derefter de âlde radiowein)

Yn 2003 wie Oerol de earste klus mei de nije TV wein, de soldearbout wie mei om de lêste kabels te meitsjen. It wie ek de earste kear fan alle dagen in Oerolsjoernaal montearre op it eilân en dan oerstrale nei Ljouwert. Tige spannend of alles sa rinne soe lykas we fantefoaren betocht hiene. Op de foto's kinne jimme sjen dat it ridlik ûntspannen om en ta gie, dat sadwaande binne we no alle kearen Live fan Westerkeyn ôf. Dit jier mei wer ekstra mooglikheden, we sille fan moandei o/m tongersdei it radio programma mei deryn in musykoptreden Live yn byld sjen litte fia Omrop Fryslân (likernoch 16.00 oant 17.00 oere)

Kameraman Harry Dijkstra en ik foar ús redaksjekantoar

Ek sille mear mei Ynternet dwaan, lykas ekstra fideobylden fan foarstellingen (dy't net yn de sjoernaals passe) sjen litte. Ek sille we op Westerkeyn yn it Mediacafé de Omrop Fryslân sjoernaals sjen litte op in grut byldskerm (en miskien ek noch materiaal fan oare Oerols).

Dit kear sil ek de nije radiowein mei de nije "outfit" fan Omrop Fryslân der wêze, wolle jimme ris wat moais sjen, lit it mij witte, dan kinne we efkes binnensjen.

Kameraman Erik Krüger

Of alles slachje sil bliuwt in fraach en dat is ek de sjarme fan Oerol, op lokaasje moat der noch fan alles útfûn wurde, mar de Sterke Ferhalen binne der al.

Oant sjen op Westerkeyn,

Frans

Produksjeperikelen

2007-06-11T17:29:00.000+02:00

Fan 'e middei mei in tal oare Oerol-gongers-kollega's om 'e tafel sitten om de produksje-kant fan Oerol troch te nimmen. Der binne noch in hiel soad losse eintsjes, mar it measte is no wol regele. En as dat net sa is, dan binne we mei elkoar kreatyf genôch om dat op te lossen. Mei-elkoar komme we der altyd út. Ferline jier wie myn earste kear foar de Omrop nei Oerol en dat hat doe poerbêste foldien. Want earlik is earlik, it is foar it wurk en dat is it fansels op it earste plak ek, mar it is tagelyk ek hartstikke leuk om der by te wêzen. Kollega Engelien start freed de saak op it eilân op en ik kom har op woansdei ôflossen. Ik ha der in hiel soad sin oan, hoopje dat it waar goed bliuwt en dat we mei-elkoar wer moaie dingen foar radio, tv en ynternet meitsje kinne.
Jim hearre/sjogge/lêze der mear oer op ús omropsite of de site fan Oerol.

Noch fjouwer nachten sliepe...

2007-06-11T13:49:00.001+02:00

...en dan sjoch ik Harns wer efter de horizon ferdwinen. Dan bin ik underweis nei Skylge om dêr ferslach te dwaan fan it Oerol festival. Oant takom wike tongersdei strún ik om op it eilan. Op syk nei moaie ferhalen en fansels nijs.

Efkes foarstelle, de "Omroppers"....

2007-06-11T09:55:00.000+02:00

Mear muzyk

2007-06-08T11:52:00.000+02:00

Yntusken is bekind wurden dat ek de bands 'Moss' op tongersdei, en 'Storybox' op freed acte de présence jaan sille yn ús radioprogramma. Hooplik slagget it om ek foar de moandei en de tiisdei in artyst te finen dy't by ús live wat spylje wol...

Moss makket moaie, dreamerige, rafelige en werkenbere popsongs. Ien fan de bandleden fan Moss spile earder yn de bekinde gitaarpopband Caesar.
Storybox is in Nederlânse americana band, en makket ferskes mei in ferhaal. Lietsjes as lânskippen.

Echt de muoite wurdich, tocht ik sa. Wolst dit meimeitsje, kom dan op tongersdei of freed nei it Mediakaffee op it Westerkeynterrein yn Midslân. Of harkje nei de radio, fansels!

Room Eleven treedt op!

2007-06-07T13:49:00.000+02:00

Op woansdei 20 juny sil de Nederlânse band 'Room Eleven' de útstjoering fan Omrop Fryslân Radio opfleure mei live muzyk. Fan 16.00 oant 17.00 oere binne se te gast yn it Mediakaffee op it Westerkeynterrein, en sille se in stik as trije nûmers hearre litte.

De fiifmansformaasje Room Eleven neamt harsels in jazzbossafolksoul-combo. Op it Oerol-festival binne se prominent oanwêzich, en dêrom meie se fansels ek net ûntbrekke op 'e radio!

Mis it net!

Noch 9 dagen....

2007-06-06T16:39:00.000+02:00

Oerol is foar in soad minsken op it eilân en fan bûten ien fan de hichtepunten fan it jier. Dit Oerolblog giet net allinnich oer jongfee dat los rint, mar ek oer losrinnende eilanners en omroppers. Yn dit weblog kinne je de kommende wiken lêze wat der dan allegearre barre kin....

It is dêrby benammen de bedoeling dat de lêzer net allinnich lêst wat wy meimeitsje, mar ek fleurich meipraat, krityk uteret en sterke ferhalen fertelt. Wy binne hiel benijd hoe't dit gean sil de kommende wiken.

tarieding

2007-06-06T10:10:00.000+02:00

Drok dwaande mei redaksjonele en produksjonele tariedings.
Alle akkreditaasjes binne regele en we binne no oan it besjen wat we de earste dragen draaien sille. Freedtemoarns om 5 oere !!! giet de earste ploech al nei it eilân

Mei de boat nei Skylge

2007-05-24T09:33:00.000+02:00

Fan 'e middei sille we mei Jos Thie oerlizze oer wat Oerol ynhâldlik allegear te bieden hat.
Dus mei de boat nei Skylge mei trije redaksjeminsken...

Omrop Fryslân op Oerol

2007-05-23T11:11:00.000+02:00

De kommende tiid sil de redaksje alle dagen "blogge" fan Oerol ôf. Ferskate meiwurkers fan Omrop Fryslân sille hjir harren ferhaal dwaan.

(Ofrûne jier wie Omrop Fryslân der ek by...)